मुकेश कुमार साह , रौतहट २८ पुस । मौलापुर नगरपालिकाले नेपाल पत्रकार महासंघ रौतहट शाखाका नवनिर्वाचित पदाधिकारीहरूलाई सम्मान गरेको छ। नगरपालिकाको कार्यालयमा आयोजित कार्यक्रममा पदाधिकारीहरूलाई सम्मानपत्र सहित दोसल्ला ओढाएर सम्मान गरिएको थियो।
कार्यक्रममा प्रमुख अतिथि पूर्वमन्त्री तथा आजपाका केन्द्रीय अध्यक्ष प्रभु शाह रहेका थिए । उनले पत्रकारिताले समाजलाई सही मार्गतर्फ डोर्याउने र लोकतन्त्रलाई बलियो बनाउन महत्त्वपूर्ण भूमिका खेलेको बताए। शाहले भने, “पत्रकारिता निष्पक्ष, जिम्मेवार र सत्यतामा आधारित हुनुपर्छ। नवनिर्वाचित पदाधिकारीहरूले यस क्षेत्रलाई थप सशक्त बनाउने विश्वास छ।”
कार्यक्रमलाई सम्बोधन गर्दै मौलापुर नगरपालिकाका मेयर रिना देवी शाहले भनिन्, “पत्रकारहरू समाजका ऐना हुन्। उनीहरूले समाजका विभिन्न विषय उजागर गरेर परिवर्तनको मार्गचित्र देखाउने काम गर्दै आएका छन्। यो सम्मानले पत्रकारिताको क्षेत्रलाई अझ मजबुत बनाउन प्रेरणा दिनेछ।”
नेपाल पत्रकार महासंघ रौतहट शाखाका अध्यक्ष संजय कुमार कार्कीले आफ्नो मन्तव्य राख्दै यो सम्मानले पत्रकारिताको क्षेत्रलाई थप प्रेरणा र उर्जा दिने बताए। सचिव गौतम श्रेष्ठले मौलापुर नगरपालिकाको यो सम्मानलाई पत्रकारहरूको योगदानको कदरका रूपमा लिएको उल्लेख गरे। उपाध्यक्ष डिल्ली बहादुर कार्की (सुब्बा)ले भने, “यस सम्मानले पत्रकारहरूको जिम्मेवारी अझ बढेको छ। समाजको हकहितका लागि हाम्रो भूमिका थप जिम्मेवार बनाउने छ।”
कार्यक्रममा नगरपालिकाका निमित्त प्रमुख प्रशासकीय अधिकृत रामबाबु शाहलगायत विभिन्न क्षेत्रका व्यक्तित्वहरूको उपस्थिति रहेको थियो।
