रौतहट २५, पुस– चन्द्रपुरमा ४ मा अवस्थित चन्द्रोदय साकोसले बुधवार एक विशेष कार्यक्रमको आयोजना गरि सुरक्षा निकायका दुई प्रमुख व्यक्तित्वलाई सम्मान तथा स्वागत गरेका छन । ईलाका प्रहरी कार्यालय चन्द्रपुरका प्रमुख प्रहरी नायव उपरीक्षक राज कुमार राई र बिरदल गुल्म पुरनेवा दरवार गौर रौतहटका प्रमुख सेनानी किशोर अधिकारीलाई संस्थाले औपचारिक रूपमा स्वागत गर्दै भविष्यमा सहकार्य गर्ने प्रतिबद्धता जनाएका छन्।
कार्यक्रममा संस्थाले विभिन्न सामाजिक र स्वास्थ्य सेवा कार्यक्रमहरूको आयोजना गर्ने उद्देश्य राख्दै सुरक्षा निकायसँग सहकार्यको प्रस्ताव अघि सारेको थियो। यस अन्तर्गत स्वास्थ्य शिविर, आकस्मिक रक्तदान, विकृती र कुलतमा फसेका व्यक्तिहरूसँग सम्बन्धित सचेतना कार्यक्रमहरूका साथै, सामाजिक संजालको सदुपयोग र दुरुपयोगको बारेमा स्कुलहरूमा शिक्षा दिने जस्ता महत्वपूर्ण पहलहरू समावेश छन्। दुबै प्रमुख व्यक्तित्वले संस्थाको यस्ता योजनालाई सकारात्मक दृष्टिकोणले समर्थन गर्दै सहकार्यको लागि तयार रहेको बताएका छन्।
संस्थाका अध्यक्ष बसन्त आचार्यले दुबै प्रमुखलाई स्वागत पत्र र मायाको चिनो प्रदान गरेका थिए । कार्यक्रममा संस्थाका उपाध्यक्ष रामशरण गौतम, ब्यवस्थापक शुभ नारायण चौधरी र अन्य सदस्यहरू उपस्थित रहेको थियो ।
