रौतहट २३,पुस – आम जनता पार्टी रौतहट जिल्ला कमिटीको बैठक आज मौलापुरमा केन्द्रीय अध्यक्ष प्रभु साहको उपस्थितिमा सम्पन्न भएको छ। संगठन विस्तार, संघर्षको समीक्षा, र आगामी कार्यक्रमहरूको तयारीमा केन्द्रित उक्त बैठकले भ्रष्टाचारविरुद्धको अभियानलाई अझ सशक्त बनाउने निर्णय गरेको छ।
बैठकले पौष २७ गते वीरगंजमा आयोजना हुने भ्रष्टाचारविरोधी खबरदारी सभामा व्यापक सहभागिता जनाउने प्रतिबद्धता व्यक्त गरेको छ। केन्द्रीय अध्यक्ष प्रभु साहले पार्टी संगठनलाई थप क्रियाशील र जनमुखी बनाउन आवश्यक रणनीति प्रस्तुत गर्दै, भ्रष्टाचारविरोधी अभियानमा सबैको एकता अपरिहार्य रहेको बताउनुभयो।
बैठकमा नरेश तुराहाको अध्यक्षतामा गठित नयाँ जिल्ला कमिटीका सदस्यहरूको स्वागत र सम्मान गरिएको थियो । कार्यक्रममा पार्टीका जिम्मेवारीहरूलाई प्रभावकारी बनाउन कार्यविभाजनसमेत गरिएको छ।
सहभागीहरूले संगठनलाई सुदृढ गर्न सुझाव राख्दै, जनतालाई प्रत्यक्ष रूपमा जोड्ने कार्यक्रमलाई प्राथमिकतामा राख्न जोड दिए। बैठकमा पार्टीका स्थानीय नेतृत्व, कार्यकर्ता, र शुभेच्छुकहरूको उत्साहजनक उपस्थिति रहेको थियो ।
आम जनता पार्टी रौतहटको बैठक सम्पन्न, संगठन सुदृढीकरण र खबरदारी अभियानमा जोड
