रौतहट २३ माघ । ईलाका प्रहरी कार्यालय देवाहीगोनाही बाट खटिएको प्रहरी टोलीले चेकजांचको क्रममा लागुओषध गाँजा बरामद गरेको छ ।
जिल्ला रौतहट देवाही गोनाही न.पा. वडा नं. ०८ गोनाही बजार स्थित संग्रालय नजिक सार्वजनिक सडकमा बिभिन्न सवारी साधन तथा पैदल यात्रुहरु चेकजाँच गर्ने क्रममा जयनगर देखी गोनाही बजार तर्फ जाँदै गरेको मधेश प्रदेश ०३-००१ ह २५२४ नम्बरको डाँफे अटोलाई शंका लागि चेकजाँच गर्दा गाँजा फेला परेको हो ।
उक्त अटोमा दुई वटा जेब्रा झोला भित्र लुकाई ल्याउँदै गरेको १० के.जि. ३ सय ग्राम लागु औषध गाँजा सहित सवारी चालक सर्लाही बागमती न.पा. वडा नं. १२ बथाने बस्ने वर्ष २२ को राजन मोक्तान, सोही अटोमा सवार वर्ष २३ को सुजन मोक्तान र वर्ष २९ की असली माया वल लाई नियन्त्रणमा लिई अनुसन्धान भइरहेको जिल्ला प्रहरी कार्यालय रौतहटले जनाएको छ ।
