रौतहट २ बैसाख ।गौर नगरपालिका वडा नम्वर ४ टिकुलियामा नवनिर्मित सामुदायिक भवनको उदघाटन गरिएको छ ।
शहरी विकास तथा भवन कार्यालय वीरगंज पर्साद्धारा गौर नपा ४ टिकुलियामा २६ लाख ८० हजार १ सय ५० रुपैया ८४ पैसाको लागतमा निर्माण भएको रामजानकी सामुदायिक भवनको गौर नगरप्रमुख शम्भु साहले उदघाटन गरेका छन ।
रामजानकी सामुदायिक भवनको उदघाटन गर्दै नगरप्रमुख साहले टिकुलियाका जनताहरुलाई एक स्थानमा बसेर आफनो समस्या, विकास निर्माण, विभिन्न कार्यक्रमका लागि विद्यालय बाहेक अन्य कुनै उपयुक्त स्थान नहुँदा यहाँको जनताहरुको आवश्यक्तालाई मध्यनजर राख्दै आफनो विशेष प्रयासमा शहरी विकास तथा भवन कार्यालयद्धारा निर्माण गराई उदघाटन गर्न पाउदा निकै खुशी महसुस भईरहेको बताए ।
आफनो कार्यकालमा गौर नगरलाई समृद्ध बनाई नागरिकहरुलाई सुखी बनाउनु नै आफनो सपना रहेको छ त्यसैमा दिनरात मेहनेत गर्दै अघि बढिरहेको हुँदा सबै नगरवासीहरुको साथ र सहकार्य एवं सकारात्मक सहयोगको खाँचो रहेको मेयर साहले बताए ।
नगरमा रहेका सडकहरुकाे स्तर उन्नती, नाला, विजुली, सडक बत्ती, मठ, मन्दीर, मस्जिद, झुलुंगे पुल, बरहवा ताल, लगायतका क्षेत्रमा आफूले विशेष जोड दिएर काम गर्दै आएको नगरप्रमुख शम्भु साहले बताए ।
गौर नपा ४ का वडाध्यक्ष संजय गिरीको अध्यक्षतामा सम्पन्न रामजानकी सामुदायिक भवनको उदघाटन समारोहमा समाजसेवी पासपत यादव, शहरी विकास कार्यालयका कार्यालय प्रमुख मदन राय लगायत टिकुलियाबासीको उपस्थिति रहेको थियो ।
रामजानकी सामुदायिक भवन २०७९ पुस २० गते सम्झौता गरेर २०७९ चैत २० गते निर्माण कार्य सम्पन्न भएको हो ।
टिकुलियामा सामुदायिक भवनको मेयर साह बाट उद्घाटन
