रौतहट, १९ चैत । गौर नगरपालिकाको नगर प्रमुख शम्भु साहले विकास निर्माण लाई प्रभावकारी तथा बेरोजगारीको समस्या समाधान गर्न कटिबद्ध रहेको बताएका छन ।
रौतहटको पहिलो नमुना नगरपालिकाको रुपमा स्थापित गराउने लक्ष्यका साथ आफू अघि बढिरहेको मेयर साहले दाबी समेत गरे ।
गौर नगरपालिकाको आयोजनामा शनिबार वार्ड नं. २ महादेवपट्टी स्थित आधारभूत विद्यालयमा आयोजित जनता दरबार कार्यक्रम अन्तर्गत सार्वजानिक सुनुवाई कार्यक्रमलाई सम्बोधन गर्दै नगर प्रमुख साहले विकास समृद्धिसँगै रोजगारी सृजना गर्ने उद्देश्य लिएर अघि बढ़ने प्रतिबद्धता जनाए ।
सार्वजानिक सुनुवाई कार्यक्रममा सहभागीहरुले उठाएका जिज्ञासामा नगर प्रमुख साहले गौर नगरपालिकामा विकास निर्माणको लागि बहुवर्षिय योजनाहरुको शिलान्यास गर्दै कामहरु द्रुत गतिमा अघिबढिरहेको हुदा चाडै गौर नगर विकास र समृद्धिको पथमा सवल हुने विश्वास व्यक्त गरे ।
भौत्तिक पूर्वाधार, सड़क, नालाको निर्माण भएमा व्यवसाय फस्टाउने र रोजगारी सृजना हुने उनको धारणा छ ।
शिक्षा, स्वास्थ्य, पूर्वाधार, स्वच्छ खाने पानी, व्यवस्थापन आफ्नो पहिलो प्राथमिकता रहेको उल्लेख गर्दै नगर प्रमुख साहले गौर नगरपालिका भित्र रहेका सामुदायिक विद्यालयमा विषयगत शिक्षकको आपूर्ति गर्नु ठूलो चुनौती रहेको उल्लेख गरे ।
७० वटा शिक्षक भर्ना गरे पनि अझ शिक्षक अभाव रहेको उनको भनाइ छ । शिक्षकको पद पूर्ति गर्न संघीय सरकार र प्रदेश सरकार संग पहल गरिरहेको उनले जानकारी गराए ।
नगरलाइ नमुना बनाउन लागेका छौ : गौर नगर प्रमुख साह
