बारा , १६ मङ्सिर //
बारामा हत्या आरोपमा एक जनालाई प्रहरीले पक्राउ गरेको छ।
जिल्लाको कोल्हवी नगरपालिका–११ का ४३ वर्षीय परीक्षण चौधरीको हत्या गरी खाल्डोमा गाडेको आरोपमा प्रहरीले १८ वर्षभन्दा कम उमेरको भएको एकजनालाई पक्राउ गरेको हो ।
बिहीबार बिहान चौधरीको शव गोठघर पछाडि खाल्डोमा पुरिएको अवस्थामा फेला परेको थियो। बाराका प्रहरी प्रवक्ता राजेश थापाका अनुसार घटनास्थलमा फेला परेको चप्पलको आधारमा ती बालकलाई पक्राउ गरिएको हो ।
प्रहरीका अनुसार बुधबार राति गाउँकै रामपुकार चौधरीको नास्ता पसलमा रक्सी सेवन गरी घर जाने क्रममा परीक्षणले बालकसँग अप्राकृतिक मैथुन गर्न खोजेका थिए। सो क्रममा बालकले दाउराले प्रहार गरी चौधरीको हत्या गरी खाल्टो खनी गाडेको प्रारम्भिक अनुसन्धानबाट खुलेको थापाले बताए।
