रौतहट,१९ मंसिर / चन्द्रनिगाहपुरमा गोल्डेन ओक कमेडी यात्रा कार्यक्रम सम्पन्न भएको छ ।
चन्द्रपुर नगर उद्योग वाणिज्य संघको आयोजनामा भएको कमेडी यात्रामा स्थानिय तथा ख्याति प्राप्त हास्य कलाकारहरुको प्रस्तुती रहेको थियो ।
निरज नेपालको प्यारोडि डान्सबाट सुरु भएको कार्यक्रमलाई सुमन कार्कीको स्ट्यान्ड अप कमेडीले पेट मिचिमिचि हाँसायो ।
कार्कीले ऋषी धमला लगायत शीर्ष नेताहरुको क्यारिकेचर गर्दै समसामायिक विषय वस्तुमा गरेको चोटिलो व्यङ्गले दर्शकको मन जित्यो ।
कलाकार सुरेन्द्र केसी ‘मुलाको साग’ र शिवशंकर रिजाल ‘जोगिन्दर पानवाला’ को सामुहिक प्रस्तुतीले पनि दर्शकहरु मन जित्न सफल भएको थियो ।
शीर्ष राजनितिक दलहरुको नेताको गतिविधि माथि गरिएको व्यङ्गले दर्शकलाई हसाएको थियो ।
कलाकार जितु नेपालको स्ट्यान्ड अप कमेडीमा पनि दर्शकहरु रमाएका थिए ।उनले राजनितिक, सामाजिक विषय गरेका चोटिला पञ्च लाइनले सभाहल मा हाँसोको फोहोरा छुटेको थियो ।
कार्यक्रम अन्त्यमा गायिका मिलन नेवारको प्रस्तुतीले दर्शकहरुलाई नचाएको थियो ।
उनले ‘फुलबट्टे सारी’ लगायतका चर्चित गितहरु गाउँदा हलमा भएका दर्शकहरु नाँच्दै मनोरञ्जन लिएका थिए ।
कार्यक्रम संंचालिका राधिका कडेँलले संचालन गरेकी थिइन ।कमेडी यात्रा लिएर देश दौडाहा निस्किएका जितु नेपालले आफुहरु चन्द्रपुरका दर्शकहरुको माया देखेर निकै उत्साहित भएको प्रतिकृया दिए ।
चन्द्रपुर नगर उद्योग वाणिज्य संघका महासचिव जनकराज भारतीले चर्चित कलाकारहरुको प्रस्तुतीले चन्द्रपुरवासीको मन जितेको धारणा राखे ।
संघका अध्यक्ष उदय नारायण सापकोटाले सो कार्यक्रमले चन्द्रपुरलाई देश विदेशमा चिनाउन मद्धत गरेको भन्दै कार्यक्रमबाट फाइदा भएको रकम संघको निर्माणाधिन भवनमा खर्च गरिने जानकारी दिए ।
