बारा ,१९ भदौ//
बारामा प्रहरी र डाँकाबीच भिडन्त हुँदा एक प्रहरी निरीक्षक घाइते भएका छन्।
गएराति झन्डै साढे १२ बजे जितपुरसिमरा उपमहानगरपालिका–२३ मा रहेको एरोटेक प्रालिमा लुटपाट गर्न आएका डाँकाकाे समूह र प्रहरीबीच भिडन्त हुँदा वरिष्ठ प्रहरी नायब निरीक्षक कमल बहादुर शाही घाइते भएका हुन्।
उद्योगमा डकैती गर्न डाँकाहरुको समूह आएको सूचना पाएपछि पुगेको वरिष्ठ प्रहरी नायब निरीक्षक (वरिष्ठ सई) शाही नेतृत्वको प्रहरी टोलीसँग भिडन्त भएको प्रहरी उपरीक्षक होविन्द्र बोगटीले जानकारी दिए।
डाँकाहरुको समूहबाट एक राउन्ड र प्रहरीको तर्फबाट तीन राउन्ड गोली चलेको प्रहरी उपरीक्षक बोगटीले बताए । डाँकाहरुको रड प्रहारबाट वरिष्ठ प्रहरी नायब निरीक्षक शाही घाइते भएका हुन् । उनको वीरगञ्ज हेल्थ केयर हस्पिटलमा उपचार भइरहेको छ ।
प्रहरीले दुईजना डाँकालाई पक्राउ गरेको छ । उनीहरुको साथबाट तीन राउन्ड गोली, एक थान भरुवा बन्दुक र एक थान कटुवा पेस्तोल बरामद गरिएको प्रहरी उपरीक्षक बोगटीले जानकारी दिए ।
