पर्सा , २२ भदौ //
पर्सामा बच्चालाई चोरी गर्न लागेको आरोपमा तीनजना भारतीय महिलालाई प्रहरीले पक्राउ गरेको छ।
स्थानीयहरुले बच्चा चोर्न खोजेको भन्दै होहल्ला गरेपछि प्रहरीले तीन जना महिलालाई पक्राउ गरेको हो ।
पक्राउ पर्नेहरुमा वीरगञ्जको छपकैयाबाट बिहारको नरकटियागञ्ज घर भई रक्सौलको ईस्लामपुर बस्ने ५० वर्षीया शैली खातुन, ४५ वर्षीया छतोती खातुन र ५३ वर्षीया मैरुन नेसा रहेकी छन्।
जिल्ला प्रहरी कार्यालय पर्साका प्रहरी प्रवक्ता प्रहरी नायब उपरीक्षक नविन गिरीले उनीहरुको सुरक्षा र थप अनुसन्धानका उनीहरूलाई पक्राउ गरिएको जानकारी दिए ।
‘बच्चा चोर्दै गरेको अवस्थामा पक्राउ परेका हैनन्, टोलमा नयाँ मानिस देखेपछि स्थानीयले बच्चा चोर्न आएको हुन सक्ने आशंकामा होहल्ला गरेका थिए । उनीहरुको सुरक्षा र थप अनुसन्धानका लागि पक्राउ गरेका छौं’, उनले भने ।
पत्थर, जन्तर र औंठी बेच्दै हिँडेका उनीहरुले बच्चा चोर्न खोजेको भन्ने जानकारी छपकैयाका बासिन्दाले प्रहरीलाई दिएका थिए ।
स्थानीयहरुले उनीहरुलाई कारबाही गर्नुपर्ने माग राखेर प्रहरी चौकी छपकैया घेराउ समेत गरेका थिए ।
यस सम्बन्धमा थप अनुसन्धान भइरहेको पर्सा प्रहरीले जनाएका छन् ।
