रौतहट , २ असार //
चन्द्रपुर नगरपालिका वडा नं ८ सन्तपुरमा सुविधा सम्पन्न हेल्थ केयर सेन्टर सञ्चालनमा आएको छ । चन्द्रपुरको केन्द्र बिन्दु मानिने सन्तपुर चौक नजिकै चपुर-गौर रोडमा अत्याधुनिक सुबिधा सम्पन्न निकुञ्ज हेल्थ केयर प्रा.ली नामक अस्पताल सञ्चालनमा आएको हो ।
बुधबार चन्द्रपुर ८ का वडा अध्यक्ष जितेन्द्र चौधरीको प्रमुख आतिथ्यतामा सो स्वास्थ्य संस्थाको उद्घाटन कार्यक्रम सम्पन्न भएको छ ।
चन्द्रपुर ८ मा पहिलो अस्पतालको रूपमा निकुञ्ज हेल्थ केयर प्रालिले सेवा विस्तार गर्न लागेकोमा अध्यक्ष चौधरीले शुभकामना व्यक्त गरेका छन । समान्य रोगका बिरामी उपचारका लागि चपुर जानू पर्ने समस्यालाई केन्द्रित गरेर स्थानीय स्तरमै गुणस्तरीय स्वास्थ्य सुविधालाई सहज बनाउनु पर्ने चौधरीले बताए ।
आफनो कार्यकालमा चन्द्रपुर ८ मा रहेको स्वास्थ्य चौकीलाई अस्पतालको रुपमा स्तरोन्नती गर्ने चौधरीको भनाई रहेको छ ।
सो अस्पतालमा २४ सै घण्टा इमरजेन्सी सेवा,ओपिडी, जेनेरल वार्ड, फार्मेसी सेवा लगायत ६ शैयाको बेडको व्यवस्था सहित आधुनिक ल्याब, एक्सरे, भिडियो एक्सरे, ईसीजी लगायतको सुविधा रहेको सो अस्पतालका सञ्चालक सौगात खतिवडाले बताए ।
बिरामी अन्यत्र जानू पर्ने समस्यालाई केन्द्रित गरेर एउटै अस्पतालबाट सबै प्रकारका स्वास्थ्य सेवा दिने गरि अस्पतालले सेवा बिस्तार गर्ने लक्ष्य रहेको खतिवडाले बताए ।
उद्घाटन कार्यक्रमको विशिष्ट अतिथिमा चन्द्रपुर नगरपालिकाका कार्यपालिका सदस्य नेत्र कुस्वार तथा विभिन्न राजनीतिक पार्टीका प्रतिनिधिहरू, स्थानीय युवा एबम् समाजसेवीहरुको उपस्थिति रहेको थियो ।
