रौतहट ०७,जेष्ठ । रौतहटको गुजरा नगरपालिकामा मतपरिणाम नै गलत सुनाएपछिको कुराले उग्र रुप लिएपछी अवस्था तनावग्रस्त बनेको छ। नगरप्रमुख पदका उम्मेदवार जसपाका शन्तलाल चौधरीको छाता छाप र वडा नम्बर ५ का स्वतन्त्र उम्मेदवार शेख जमालुद्दिनले पाएको मत परिणाम गलत सुनाएपछि विवाद बढेको हो । उम्मेदवारका समर्थकहरुले मतगणनाको गेटमा ढुंगामुढा गर्दै ट तोडफोडको प्रयास समेत गरेका छन् । स्थिति नियन्त्रणमा लिन सुरक्षाकर्मीले दुई राउन्ड अश्रुग्यास प्रहार गरेको छ । यस नगरपालिकामा कर्मचारीले मतपरिणाम सार्वजनिक गर्दा पटक-पटक त्रुटि गर्दै आएका छन् ।
इलाका प्रहरी कार्यालय चन्द्रनिगाहपुरबाट प्रहरीको थप मद्दत टोलीसमेत त्यस क्षेत्रमा पुगेको छ । अहिले मतदानस्थल बाहिरको अवस्था तनावपूर्ण छ । मतपरिणाम नै गलत सुनाएपछि मतगणना दिउँसोबाट रोकिएको छ । परिणाम गलत आउन थालेपछि मतगणनास्थल बाहिर बसेका उम्मेदवारका समर्थकले नाराबाजी गरेका थिए । त्यसपछि ढुंगामुढा गर्दै मतगणनास्थलको मुख्य ढोका फोरेर भित्र प्रवेश गर्न लागेका हुन् ।
प्रमुख जिल्ला अधिकारी कृष्णबहादुर शाहीले मतपरिणाम गलत लेख्ने कर्मचारीलाई हटाइएको बताएका छन् ।
अहिले कांग्रेस, एमाले र एकीकृत समाजवादीलगायत दलले धर्ना बसी पुन: मतगणनाको माग अघि सारेका छन् ।
यस अघि पनि गुजरा ३ का निर्वाचित वडाध्यक्षले पाएको मत परिणाममा गलत भेटाएपछी प्रतिद्वन्दीका स्वन्त्र उम्मेदवारले पुन मतगणनाको माग राख्दै जिल्ला निर्वाचनमा निवेदन दिएका थिए ।
