सर्लाही , ८ चैत //
सर्लाहीमा स्कारपियोको ठक्करबाट एक पैदलयात्रीको मृत्यु भएको छ।
मृत्यु हुनेमा गोडैता नगरपालिका–१० का ४० वर्षीया रञ्जिता देवी मण्डल रहेको प्रहरीले जनाएको छ।
गएराती जिल्लाको दक्षिणी भेगस्थित गोडैता नगरपालिका–१०, स्थित भित्री सडकखण्डमा भारतीय डीएल ४ सीएनबी २२९९ नम्वरको स्कारपियाले ठक्कर दिँदा गम्भीर घाइते भएकी रञ्जिता देवीलाई उपचारका लागि प्रादेशिक अस्पताल मलंगवा ल्याउँदा चिकित्सकले मृत घोषणा गरेका प्रहरी चौकी गोडैताले जनाएको छ ।
मृतक रञ्जिता देवी भारतको सीतामढी भलुवाहा घरभई गोडैतास्थित माइती घरमा बस्दै आएकी थिइन् । उक्त दुर्घटनामा गोडैता नगरपालिका–११ निवासी अर्का पैदलयात्री ६५ वर्षीया जयकलिया देवी मण्डल घाइते छिन् ।
उनको प्रादेशिक अस्पताल मलङ्गवामा उपचार भइरहेको तथा दुर्घटनामा संलग्न स्कारपियो प्रहरी चौकी गोडैतामा नियन्त्रणमा रहेको प्रहरीले जनाएको छ । दुर्घटना पश्चात फरार रहेका चालकको खोजि भइरहेको प्रहरीले जानकारी दिएको छ ।
