रौतहट , १८ फागुन //
कटहरियामा करेन्ट लागेर आज एक वृद्धको मृत्यु भएको छ । मृत्यु हुनेमा कटहरिया नगरपालिका २ हंथियाहीका ६२ वर्षीय हरिनारायण राउत बरै रहेका छन्।
बुधबार बिहान करिब साढे ७ बजेतिर आफ्नै मकैबारीमा मोटरबाट पानी पटाउने क्रममा नाङ्गो तार छुदाँ बरैको घटनास्थलमै मृत्यु भएको स्थायी प्रहरी चौकी छेदिचौकका प्रमुख असई गणेश यादवले जानकारी दिए ।
मोटर स्टार्ट गरेर पानी पटाउने क्रममा बरैले मोटरमा लपेटिएको तार देब्रे हातले सिधा पार्न खोज्ने क्रममा तारमा काटिएको ठाउँबाट हातमै करेन्ट लागेको असई यादवले बताए ।
मृतकको शव पोष्टमार्टमका लागि प्राथमिक स्वास्थ्य केन्द्र चन्द्रनिगाहपुर पठाइएको इलाका प्रहरी कार्यालय कटहरियाले जानकारी दिएको छ ।
