सर्लाही , १० फागुन //
सर्लाहीमा स्यालको टोकाईबाट १५ जना घाइते भएका छन् ।
आज बिहानै गाउँ पसेको दुई वटा स्यालले विष्णु गाउँपालिका वडा नम्बर २ र ४ स्थित नदिया पकडी र पकडी गोठमा स्थानीयमाथि आक्रमण गर्दा १५ जना घाइते भएका हुन्।
स्यालको आक्रमणबाट बालबालिका र वृद्धवृद्धासमेत घाइते भएको सर्लाहीका सूचना अधिकारी एवं प्रहरी निरीक्षक कृष्ण गिरीले जानकारी दिए । स्यालको आक्रमणबाट घाइते भएकाहरुमध्ये २ जनाको अवस्था गम्भीर रहेकोले थप उपचारका लागि काठमाडौँ पठाइएको उनले बताए ।
अन्य घाइतेहरुको जिल्ला अस्पताल र स्थानीय स्वास्थय संस्थामा उपचार भइरहेको सर्लाही प्रहरीले जनाएको छ ।
