सर्लाही , २ फागुन //
सर्लाहीमा आगोले जलेर एक वृद्धको मृत्यु भएको छ। मृत्यु हुनेमा बागमती नगरपालिका–८, शंकरपुर सोल्टी बस्ने स्थानीय ६६ वर्षीय राम आशिष साह रहेका छन्।
आज बिहान २ बजेतिर आफ्नै घरको आँगनमा आगोले जलेर उनको मृत्यु भएको प्रहरीले जनाएको छ। वृद्ध आगोमा जलिरहेको देख्नासाथ तत्कालै छिमेकीहरूले पानी हालेर आगो निभाए पनि उनलाई बचाउन भने सकेनन्।
राति घरमै सुतेका वृद्ध अचानक शरिरमा कसरी आगो लाग्यो? भन्नेबारे केही खुल्न नसकेको जनाइएको छ । मृतकका दुई छोरा बरहथवा स्थित काठ चिरान मिलमै बसेको बुझिएको छ। वृद्धसँगै परिवारका अन्य सदस्यहरु घरमै सुतिरहेका थिए।
मृतकको शव पोष्टमार्टमका लागि जिल्ला अस्पताल मलंगवा पठाएको र घटना सम्बन्धमा थप अनुसन्धान भइरहेको सर्लाही प्रहरीले जनाएको छ।
