बारा , ११ माघ //
बारामा बेहुला बोक्ने रथले किचेर २ जनाको मृत्यु भएको छ ,भने १६ जना घाइते भएका छन् । मृत्यु हुनेमा आदर्शकोतवाल गाउँपालिका वडा नम्बर ३ बतरा बस्ने बनारसी रामको १६ वर्षीया छोरी निलम कुमारी राम र सिम्रौनगढ नगरपालिका वडा नम्बर ७ जानकीनगर बस्ने दिपेन्द्र रामको २५ वर्षीया श्रीमती बालकुमारी राम रहेकी छिन।
गएराती आदर्शकोतवाल गाउँपालिकाका स्थानीय लक्षु राम महरा चमारको छोरा सियाराम महरा चमारको बिहेका लागि ल्याइएको रथ बेहुला बोकेर जन्तीमा निस्केको समयमा अनियन्त्रित भई दुर्घटना भएको प्रहरीले जनाएको छ। प्रहरीका अनुसार रथ अचानक तिव्र गतिमा कुद्दा रथको अगाडी रहेका मानिसहरुलाई कुल्चिदा दुई जनाको घटनास्थलमै मृत्यु भएको जिल्ला प्रहरी कार्यालय बाराका प्रहरी प्रमुख राजेश थापले बताए ।
उनका अनुसार घाइतेहरुलाई उद्दार गरि उपचारका लागि कलैया अस्पताल ल्याईएको र घटना सम्बन्धमा थप अनुसन्धान भइरहेको छ। घाइते मध्ये ६ जनाको अवस्था गम्भिर रहेको प्रवक्ता थापाले जानकारी दिए।
