रौतहट , ११ माघ //
रौतहटको दुर्गा भगवती गाउँपालिकामा अध्यक्ष कप टि–२० क्रिकेट टुर्नामेन्ट शुरु भएको छ। मंगलवार देखि दुर्गा भगवती गाउँपालिका स्थित सरस्वती माध्यमिक विद्यालय पिपरा भलोहियाको खेलमैदानमा अध्यक्ष कप टि–२० क्रिकेट टुर्नामेन्ट शुरु भएको हो।
गाउँपालिकाको आर्थिक सहयोग तथा मारुती क्रिकेट क्लव गंगापिपराद्वारा आयोजित अध्यक्ष कप टि–२० क्रिकेट टुर्नामेन्टलाई नेपाली काँग्रेस मधेश प्रदेशको सभापति कृष्णप्रसाद यादवले एक समारोहका विच उद्घाटन गरेका हुन्।
प्रतियोगितको उदघाटन गर्दै सभापति यादवले खेलकुद आफैमा राम्रो पक्ष रहेको बताउदै यसबाट किशोरहरुको वृद्धि विकास, आत्मबल बलियो बनाउन, शारिरीक विकासको साथ यस पालिका भित्र लुकेको प्रतिभालाई प्रदर्शन गर्ने अवसरको रुपमा लिनुपर्नेमा जोड दिए ।
कार्यक्रममा दुर्गा भगवती गाउँपालिकाको अध्यक्ष अरुणकुमार साहले पालिकाको ५ वटै वडाका किशोरकिशोरी एवं युवाहरुलाई खेलकुदको माध्यमबाट अगाडी बढाउन पालिकाले हर सम्भव सहयोग गर्ने बताए ।
आजको उदघाटन खेल दुर्गा भगवती गापा वडा नम्वर २ र ५ विच भईरहेको आयोजक मारुती क्रिकेट क्लवका अध्यक्ष पंकज गुप्ताले जानकारी दिए ।
