सिरहा , १९ पुष //
सिरहामा बन्दको अवज्ञा गरेको भन्दै जनमत पार्टीका कार्यकर्ताले ट्रकमा आगजानी गरेको छ।
सिरहाको मिर्चैया बतहाखोला नजिकै हिमालय सुगरमिल्समा उखु पुर्याएर पश्चिमतर्फ जाँदै गरेको ना ५ ख १००९ नम्बरको ट्रकमा आगजनी गरेका हुन् ।
जनमतका कार्यकर्ताहरुले एक्कासी ट्रकमा ढुंगामुढा गरेपछि आत्तिएर गाडी रोक्ने बित्तिकै ट्रकमा पेट्रोल छर्केर आगजनी गरेको ट्रकका धनीसमेत रहेका चालक विजय साहले बताए। घाइते चालक र सहचालकको मिर्चैयामा उपचार भइरहेको प्रहरीले जनाएको छ ।
आगोलाई प्रहरीको सहयोगले नियन्त्रणमा लिइएपनि ट्रक पूर्णरुपले जलेको छ। साहले आफ्नो पाँच कठ्ठा जमिन बैंकमा धितो राखेर दुई वर्ष अगाडि ट्रक किनेको बताए ।
ट्रकको आम्दानीले ऋण तिर्ने योजना बनाएपनि अहिले ट्रकमा नै आगजनी भएपछि उनी चिन्तित भएका छन् ।यसअघि पनि जनमतका कार्यकर्ताले सिरहाको चोहर्वा र सप्तरीमा राजमार्गमै ट्रक जलाएका थिए ।
