महोत्तरी , १३ पुष //
महोत्तरी जिल्लाको एकडारा गाउँपालिका–३ भटौलिया बजारमा एकैचोटी पाँचवटा पसलमा आगलागी भएको छ।
गएराती करिब ९ बजेको समयमा आगलागि हुँदा पांच लाख बढीको क्षति भएको प्रहरीले जनाएको छ।
जिल्ला प्रहरी कार्यालय महोत्तरीका प्रहरी नायब उपरीक्षक प्रकाश विष्टका अनुसार भटौलिया बजारमा स्थानीय रामएकवालको चिया पसल, राजकुमारी साहको खाजा पसल, योगेन्द्र साहको चिया पसल, शम्भु साहको खाजा पसल र मङ्गल साहको चिया पसलमा आगलागी भएको हो।
एकैचोटी पांच वटा पसलमा आगलागी हुँदा कसैले आगजानी गरेको हुन सक्ने प्रहरीको भनाइ छ।
आगजनीबाट पाँचवटै पसलभित्र रहेका विभिन्न खाद्यान्न, कुर्सी, बेञ्च, टेबुल, फ्रिज, भाँडाकुँडा, ग्यास सिलिण्डर, चुल्हा र घरसमेत जलेर रु पाँच लाख बढीको क्षति भएको पसलेहरूले बताएका छन् ।
पसलमा रातिको बेला कोही नभएको अवस्थामा आगजनी गरिएको थियो ।
आगो नियन्त्रणमा लिन नसक्दा सबैथोक जलेर नष्ट भई लाखौँको क्षति भएको प्रहरीले जनाएको छ ।घटना सम्बन्धमा थप अनुसन्धान भइरहेको महोत्तरी प्रहरीले जानकारी दिएको छ।
