सर्लाही , १ पुष //
सर्लाहीमा आगलागी हुँदा घरमा सुतिरहेकी दुई बालिका र एक वृद्धसहित तीनजनाको मृत्यु भएको छ ।मृत्यु हुनेमा सर्लाहीको कविलासी नगरपालिका ७ सिरसिया टोलका जोगी महराकी ३ वर्षीया छोरी सुगन्धी महरा र ५ वर्षीया छोरी लक्ष्मी महरा रहेकी छिन्।
गएराती सवा ९ बजेतिर विद्युत सर्ट भइ आगलागी हुँदा महराको फुसको कच्ची घरमा आगलागी भएको थियो।
आगलागीबाट छोरी लक्ष्मी र सोगान्धी जलेर गम्भीर घाइते भएकी थिइन् । दुबैजनाको जिल्ला अस्पताल मलंगवामा उपचारपछि थप उपचारका लागि काठमाडौं लैजाँदै गर्दा बाटोमै मृत्यु भएको जिल्ला प्रहरी कार्यालय सर्लाहीका प्रहरी प्रवक्ता प्रसाद बुढाथोकीले बताएका छन् ।
समान्य घाइती भएकी चमारकै अर्की छोरी ५ वर्षीय सुधा कुमारीको स्थानीय मेडिकलमा उपचारपछि घर पठाइएको उनले बताए । आगो स्थानीयबासी र प्रहरीको सहयोगमा करिब २५ मिनेटपछि आगो नियन्त्रणमा लिएको थियो ।आगलगीमा करिब ५० हजार बराबरको क्षति भएको पिडित महराले बताएका छन्।
यस्तै मलंगवा नगरपालिका -६ खुटौनाको ७० वर्षीय वृद्ध नसिर खाँनको मृत्यु भएको सर्लाही प्रहरीले जनाएको छ। जाडोबाट बच्नका लागि परालको घुर बाली आगो ताप्दै गरेका नासिरको कपडामा एक्कासी आगो सल्किदा ज्यान गएको प्रहरीले जनाएको छ ।
नासिर करिब साढे ११ बजेतिर घरभन्दा ५ सय मिटर पर आगो ताप्न गएका थिए । कपडामा आगो लागेपछि छटपटाउँदै उनी छेउकै नालीमा गएर खसेका थिए । प्रहरीले नालीमा खसेको अवस्थामा नासिरको उद्धार गरेका थिए ।
आगोले पोलेर गम्भीर घाइते भएका नासिरलाई प्रहरीले उपचारका लागि जिल्ला अस्पताल ल्याइएपनि उपचारको क्रममा उनको बिहीबार बिहान सवा ७ बजेतिर मृत्यु भएको प्रवक्ता बुढाथोकीले बताएका छन् ।
