रौतहट , २९ मंसिर //
रौतहटको गौरस्थित एक पोखरीमा एक जना युवकको शव फेला परेको छ।
गौर नगरपालिका वडा नम्बर १ स्थित शिवालय मन्दिरको छेउमा रहेको पोखरीमा युवकको शव फेला परेको प्रहरीले जनाएको छ।
फेला परेको शव स्थानीय वडा नम्बर २ निवासी ३० वर्षीय शेख एकवालको रहेको प्रहरीले पुष्टि गरेको छ ।
एकबाल विगत दुई दिनदेखि सम्पर्क विहिन भएका थिए।स्थानीयले युवकको शव देखेपछि प्रहरीलाई खबर गरेका थिए ।
प्रहरीका अनुसार एकवाल सोहि ठाउँमा डेरा गरेर बस्दै आएका थिए । उनि छारे रोगबाट समेत ग्रस्ती भएको कारण पोखरीको पानी हेर्दा लडेर पोखरीमा खसेको हुनसक्ने प्रहरीको प्रारम्भिक अनुसन्धानबाट खुलेको छ।
पिठ्युमा कपडाको झोला सहित युवकलाई मेसिनको साहयताले पोखरीबाट बाहिर निकालिएको हो ।
युवकको शव परीक्षणको लागि जिल्ला अस्पताल गौरमा राखिएको र थप अनुसन्धान भइरहेको रौतहट प्रहरीका प्रहरी प्रमुख विनोद घिमिरेले जानकारी दिए ।
