रौतहट , ९ मङ्सिर //
राष्ट्रिय परीक्षा बोर्डले कक्षा १२ को परीक्षाको नतिजा अगामी मंसिर २० गतेसम्म सार्वजनिक गर्ने भएको छ ।
बोर्डका परीक्षा नियन्त्रक कृष्ण शर्माका अनुसार अहिले उत्तरपुस्तिका परीक्षणबाट प्राप्त नतिजालाई सम्परीक्षण तथा तालिकीकरणको काम भइरहेको छ ।
कुनै प्राविधिक समस्या नआए मंसिर २० गतेभित्रै नतिजा सार्वजनिक गर्ने तयारी गरिएको शर्माले बताएका छन् ।यस वर्ष कक्षा १२ को परीक्षा गत भदौ ३० गतेदेखि असोज ८ गतेसम्म सञ्चालन गरिएको थियो।
परीक्षामा पौने चार लाख विद्यार्थी सहभागी भएका थिए ।गएको परीक्षामा कोभिड–१९ सङ्क्रमण का कारण सहभागी हुन नपाएका देशभरीका कक्षा १२ का ४१ परीक्षार्थीका लागि बोर्डले मंसिर १६ गते अर्को परीक्षा सञ्चालन गर्ने जानकारी दिएको छ ।
छुटेका विद्यार्थीको लागि सम्बन्धित जिल्लाबाटै परीक्षा दिने व्यवस्था मिलाएको राष्ट्रिय परीक्षा बोर्डले जनाएको छ।
