रौतहट , ७ मङ्सिर //
रौतहटमा मोटरसाइकल दुर्घटना हुँदा एक जनाको मृत्यु भएको छ , भने अन्य दुई जना घाइते भएका छन् ।मृत्यु हुनेमा चन्द्रपुर नगरपालिका ९ का २४ वर्षीय रामाशंकर साह रहेका छन्।
गएराती चन्द्रपुर नगरपालिका ८ बैजनाथपुर चौकमा ना ५३ प ६११२ नम्बर र सोही विपरीत दिशाबाट आईरहेको ना ४३ प ६२४३ नम्बरको मोटरसाइकल एकआपसमा ठोक्किंदा साह घम्भिर घाइते भएको प्रहरीले जनाएको छ। घाइते साहलाई उपचारका लागि चन्द्रपुर अस्पतालमा ल्याएपनि उपचारकै क्रममा मृत्यु भएको चन्द्रपुरका प्रहरी प्रमुख लिलाराज लामिछानेले जानकारी दिएका छन्।
यस्तै दुर्घटनामा परि घाइते भएका गुजरा ९ बस्ने मनोज चौधरी र मोटरसाइकलको पछाडि बसेकी वृन्दावन ७ की कान्ती देवीको सोही अस्पतालमा उपचार भइरहेको उनले बताएका छन्।
ठोकिएको दुईवटा मोटरसाइकल नियन्त्रणमा लिई घटनाबारे थप अनुसन्धान भईरहेको ईलाका प्रहरी कार्यालय चन्द्रपुरले जनाएको छ ।
यसैबीच आज बिहान ५ बजे एउटा नम्बर नखुलेको एम्बुलेन्सले बाल्चनपुर चौकमा एकजना पैदल यात्रुलाई ठक्कर दिएर भागेको छ ।
एम्बुलेन्सको ठक्करले पैदल यात्रुको खुट्टा भांचेपछी स्थानीयले केहिबेर गौर चन्द्रपुर सडकखण्डको बाल्चनपुर चौकमा केहिबेर चक्काजाम समेत गरेको थियो ।
घाइते लाई उपचारको लागि चन्द्रपुर अस्पतालमा पठाएर बाटो खुलाएको तथा ठक्कर दिएर भाग्ने एम्बुलेन्सको खोजी भैरहेको ईलाका प्रहरी कार्यालय चन्द्रनिगाहपुरले जानकारी दिएको छ ।
